فاستخف قومه فأَطاعوه إنهم كانوا قوما فاسقين ** فلما آسفونا انتقمنا منهم فأَغرقناهم أَجمعين

مبارك كان راجل طيب بس اللي حواليه هما اللي وحشين 2-أبو الفتوح والبرادعي وأبو إسماعيل وإبراهيم عيسى والأسواني ويسري فودة وريم ماجد ومحمود سعد وحسام عيسى، إلخ حلال فيهم الشتيمة .. لكن طنطاوي وشفيق وبدين والجنزوري وشرف إلخ، عيب عشان دي مش اخلاق 3-الشرطة والجيش يموّتوا في الناس، عادي اصل الناس دي بلطجية .. لكن واحد يحدف طوبة على الشرطة ولا الجيش ولا يتصور في فيديو وهو بيشتم، يبقى مش متربي ومش متظاهر سلمي ..... بتستسهلوا الرصاصة اللي تموت إنسان وتستكتروا طوبة ولا شتيمة!! المجلس العسكري ومن قبله مبارك ياخد قرار بمزاجه لمصلحته ومصلحة الشلة ويغورالشعب، آه وماله أكيد هو فاهم أكتر وبعدين ده الريس وده حقه!! .. لكن اللي في التحرير وباقي ميادين مصر يطالبوا بحاجة للناس كلها (حرية - قضاء مستقل - رئيس حكومة ثوري - تطهير مؤسسات - إلخ)، لأ دي ديكتاتورية هو أنتوا هتمّشوا كلامكم علينا!! المجلس العسكري ينشر فيديوهات ضد الثوار، تتصدق علطول ولازم العيال دي تتلم في المعتقلات .. تطلع فيديوهات تانية تثبت كدب المجلس، تبقى يا اما متفبركة يا اما نسكت بحجة إننا مش عارفين الحقيقة فين!! أيها "المواطنين الشرفاء"، مصيبة أي أمة في تاريخ البشرية كانت سكوت الناس على الظلم واللي كانوا بيتحركوا كان بيتقال عليهم (رعاع الناس) اللي هي بـلغتكم (بلطجية وغوغاء وشكلهم غلط ومش دول ثوار يناير) وكان بيتقال على عددهم (شرذمة قليلون) اللي هي بـلغتكم (أنتم كلكم على بعض كام - أنتم ما بتمثلوش الشعب المصري كله) .. بس على فكرة أنتم بالنسبة للطغاة لسان بس .. هو المخ اللي بيفكر في كل ما هو مستبد وأنتم اللسان اللي بيردد كلامه ويديله ضوء أخضر للقمع .. بس الطغاة على مر العصور كانوا بيحترموا خصومهم وبيحتقروا البهلوانات (فاستخف قومه فأَطاعوه إنهم كانوا قوما فاسقين ** فلما آسفونا انتقمنا منهم فأَغرقناهم أَجمعين)